VITAMIN E SINK-IN MOISTURE MASK & TEA TREE FACE MASK 

the body shop 

تدوينة اليوم عن ماسكات للوجه من بودي شوب ،موجودة بالسوق من دهور! بس الأغلب يفضل مايخسر البادجت حقه في ماسكات وهو في إمكانه يسوي أشياء بالبيت طبيعية ومتوفرة بالثلاجة ،والبعض يتجنب عمل قناعات دورية لضيق الوقت او الحوسة اللي تسببها الماسكات الطبيعية والريحة اللي مش ولابد هههه وتأثيرها عالبشرة بطئ نوعا ما!ويبغا لها ألتزام  ..

لهذا ماسكات المحلات هي الأنسب ! وعلى هالأساس من فترة لفترة احاول أشتري عشوائيا يمكن يزبط معاي واحد وأعتمده ههههههه

 يفضل تسوي قناع للبشرة للغرض تغدية البشرة مو بس تنقيتها وتنظيفها من الشوائب .أخترت ماسك فايتامين E من بودي شوب .هذا الماسك مناسب جدا لذوات البشرة المتصحرة الجافة جداً واللي تحتاج ترطيب .مع هذا أنا أخذتها وانا بشرتي ذهنية جداً . غلط جدا تعتقدي ان البشرة الذهنية ماتحتاج ترطيب . ترى حالها حال الجافه لكن يبغا لها تنظيف أكثر .

المهم البشرة الجافة تحتاج hydrating  يعني عمليه تساعد الجسم عالأحتفاظ بالماء وهذا الماسك يقوم بالعمل هذا .

مهم جدا قبل أي قناع تكون البشرة نظيفة  يعني أغسلي وجهك أو قشريه جففيه بفوطة وبعدين حطي الماسك  عشان تضمني إمتصاص البشرة للمواد المفيدة  ،لأن بشرة وسخة وقناع يزيد الطين بلة ..!

قناع الترطيب العميق . تدهني البشرة وهي نظيفة بطبقة رقيقة <<لاتبالغي وتحطي طبقات وتظني ان المفعول بيبان اكثر لان البشره بتاخد اللي يكفيها بس  فلا تعطيها ازيد من ماتبغا ! أتركيها لمدة ١٠ دقائق وأسترخي  وبعدها أزيلي  الطبقة بمناديل ورقيه او فوطة للوجه ..

تجربتي معه جميل جدا مرطب <يعني أدى المطلوب منه ينفع لأيام الشتاء الباردة  ويعطي نضارة كأنك حاطة كريم أساس وموردة:) 

عيبه ماسك واخد وحتى لو ابيض ذهب مابشتري لي كل اسبوع واحد ومهم الالتزام اذا تبغي تحصلي نتيجة ، اعتبره شوي تدليع للوجه لو اخذتيه يعني تأثيره مو دائم يعني يومين ثلاثة وبشرتك تعود طبيعي .:) سعره دولارين ونص :)

الماسك الثاني الأخضر هو ماسك شجرة الشاي ، الشاي معروف بوفرة مضادات الأكسدة فيه . الأكسدة شي ممكن تسمعي فيه كثير وماتعرفي ايش هو ! كل شي هالايام يقول لك antioxidants  يعني مضاد للأكسدة !  ايش فايدته انا اقولك :@

ببساطه لما تجيبي تفاحة وتقشريها وتتركيها برا لفتره بفعل عوامل الجو وباقي الاشياء يصير لونها بني  وتتلف جزئيا لهذا ينصحوا أنك تحطي عليها حامض <<هذا هو مضاد للأكسده يعني يمنع الأكسجين يأثر عليها ويطول بعمرها 

جسم الانسان او البشرة تمر بعوامل العمر والجو والتغديه الى التأثر مع الزمن والاكسده تفاعل طبيعي يحدث في جسم الانسان وشئ لابد منه ..

يعني اللي يصير ان الخلايا تنقسم يصير فيها خلل او تدمر كما تدمر الأحماض الدهنية الموجودة في الخلية اللي يخلي  أجسامنا عرضه للعديد من الالتهابات والفيروسات والسرطانات.مضاد الاكسدة هذا يقوم بالحفاظ على غشاء الخلية ويخلي البروتين  فيها يعني خط دفاع من السموم والالتهابات ..

المهم قناع شجرة الشاي هذا أعتبره قناع مبرد يعني ريفريشينق ، ينظف بعمق ويعطي نعومة للبشرة ، مناسب جدا للبشرة الذهنية للتخلص من الدهون الزايدة وكمان يخفف من البقع إن وجدت مع الاستعمال المتكرر وينعم البشرة. تحسي بالنظافة بعد الاستعمال ويعطي شعور نعناعي :@ ههههه  . السعر نفس الثاني :) 

هل باشتريها مرة ثانية اعتقد ماسك الترطيب ، فيتامين e!عموما انا ماؤمن ان بودي شوب محل يوفر منتجات طبيعية ١٠٠٪  مع هذا أحسه أسعاره مناسبه .. وخياراته كثيره ..