Juice for Clear Skin & Abundant Energy! / عصير أنثوي بحت !!!

أذكرأن العصيرات المصنعة والمدعمة بفيتامينات وخصوصا الي مكتوب عليها مدعم بفيتامين سي ابتعدوا عنها ، البنات الكيوت اللي يشربوا سن توب تراه اكس كبير في عالم العصيرات ! الجسم ماياخد اكبر من حاجته  ولما تحط جغمة فيتامين مصنع في فنجان الجسم ماراح يتقبله ويتعامل معاه كسموم ! عادة فيتامين سي يعادي معدن النحاس اقصد فيتامين سي المصنع ! وهذا سبب رئيسي لفقر الدم لان واحد من مكونات الدم غير الحديد والزنك مفقود ! جربي الابتعاد عن العصيرات الخربوطيه صدقيني مو نهاة الحياة ! لاتشربي عصير استغرب الا يشربوا عصيرات احس اني اشرب سيرب مو عصير ، كمية سكر مو طبيعية !  وشوية طعم ! 

تبن بشرة حلوة وصافية ومشدودة  بلشي من الداخل ! غيري اكلش بلا دكاترة بلا فيلر بلا ميزو ثرابي 

معلمتنا كانت تقول اذا الفواكه والخضار موجوده ليش تاخدي حبوب وفيتامينات ! ، نظفي دمج ، كليتش وكبدش خلش نظيفة من الداخل بينعكس على نضارة البشرة وحتى ريحة جسمك . صدقني مافي شي يأثر بالبشرة خارجيا دام الداخلي متوفي هههههههه 

المكونات :

أستخدمي عصارة الجزر وليس الخلاط لان امك بتذبحك اذا تكسر الخلاط وبتدعين عليي مو لي !

• جزرة واحدة
  
  • تفاحة خضراء وليست حمراء 
  • شمندر / بنجر/ بيت واحدة 
  • برتقالة 
  • المكون الخامس بكيفك انتي واختيارك  ساعات احط بقدونس  او زنجبيل او رمان  او حتى خس !
  الطعم كيف ؟
• لذيذ جدا وعلى ضماني طعم الشمندر يعطي طعم مثل الرمان مرة حلو والزنجبيل لو حطيتيه بيعطي حرارة
• طبعا من الخلاط للكاس لفمك مايحتاج تحطيه بالثلاجة العصاير الطبيعية علطول تشربيها 
• متى تشربيه ؟ يفضل على الريق من الصباح ..

فوائد

بالصورةيختلف عن الاول لان ترتيب الفواكه لما انحط بالخلاط يختلف :@

 

• الجميع يعرف ان البرتقال والتفاح مفيد لإحتوائه على فيتامينات ومعادن ولكن مالايعرفه الجميع وهو الاهم :
• calcium-D-glucarate

فوائد هذة المادة :

• طرد السموم من الجسم التي نستقبلها من الماء والجو والاكل 
• تنظيم الهرمونات وطرد الهرمون الانثوي الضار E1
• تحسين وظائف الكلى عن طريق تخفيض إنزيم  glucuronidase  بيتا  الذي يقوم بالسماح للهرمونات المضرة والسموم بالمرور بالجسم 
• يوجد في البرتقال ، التفاح ، الجزر ،، الخ 

الشمندر دائما مع التفاح والجزر هذا ثلاثي ملائم ..

• يوقف الخلايا السرطانية ونموها 
• يقوى البصر ويزيل الاحمرار والتعب والجفاف بالعين 
• يساعد في إزالة التعب من جراء الرياضة الجسدية " الام العضلات" 
• يزيل السم وآثاره ويزيل الإمساك 
• يجعل الجلد صحيا واكثر نضارة  ويزيل حب الشباب 
• يحسن النفس ويزيل الراءحة الناتجة من سؤ الهضم 
• يقلل ألم الحيض / حمى الفراش / مغدي عالي وفعال يحمي الكلية والبنكرياس والكبد من الامراض ويعالج القرحة .. 
• يقوى جهاز المناعة ..

لو أكمل ماراح اخلص ،،، 

نكتفي 

قولوا لي عصيركم المفضل ؟ابغا حممممماس :@ 

 

 باليت نيكد ٢ من اربن دكاي /  Urban Decay Naked2 Palette

هلو بيوتيز 

اليوم بنتكلم عن هذا الباليت ،اللي يعرفني يعرف اني مهووسة بالمكياج احب اشوفه احب اقتنيه ، بس مو وايد احطه بس بالمناسبات وهاذي  في السنة حسنة :| 

المهم نيكد من الصرعات والموضات للبنات ، واني مع الخيل ياشقرا ، رحت سيفورا لان هم اللي اول ناس نزلوه وشفت الفرق بين نيكد ١ ، نيكد ٢ ، نيكد ٣ 

نيكد او نيود ليش ده الاسم ؟ عشان ان الالوان تقارب بشرة الجسم ، بشرة الجسم عادة الوان ترابية وهذا اللي بتشوفيه بالباليت مجموعة من درجات الالوان الترابية ١٢ لون ... 

ليش نيكد ٢ مو ١ ولا ٣ ؟ الناس اذواق ! وبنظرة وحده حسيت بالتشابه الكبيييير بينهم يعني الا عندها ١ ماله داعي تشتري ٢ او حتى ٣ اللي يختلف ان الشدو ممكن يكون هنا لماع وفي باليت ثاني مات  واعتقد هذا في لون جاى على ترابي محمر وهذا اللي خلاني اخده .. 

الالوان مو شي جديد هيه بس هبة ! تقدري تحصلي الوان مقاربة من ماركات ثانية، خلينا نستعرض بعض الالوان او نعلق على بعض الالوان   من اليسار من الافتح للاغمق .

•  الاول  يسمى foxy  اللون بيج مصفر ومطفي ، عيبه إنه بالكاد يرى ! invisible !مهما حطيتي مايبين ! يصلح كاإضاءة تحت الحاجب او بيس بعد البرايمر ! وبعدين تبدي الشغل ..
• الثاني half baked  جاي على نحاسي مذهب :@ < ياعيني على الالوان ههههه  وفيه شيميرنق او لمعة . ملمسه ناعم واعتقد انه اساسي لان موجود في نيكد ١ الفيرجن 
• booty call هذا جديد وجاي على خوخي بيج بلمسة بيضا :@ اللي يقهر الملمس البودري !
• chopper جاي على برتقالي محمر بس مو برتقالي وهذا الحلو فيه ..
• tease احسه انترستنق ! العجيب او اللي ماعجبني الالوان ماتصبغ بسرعة يمديني احفر بالباليت عشان يطلع اللون !:|
• snake bite  جاي على دارك برونز اعتقد انه جميل جدا 
• suspect جميل وهادى جاي على برونز طبعا مقارنة بنيكد ون هذا اكثر جاي على ذهبي وانعم بالملمس 
• pistol مرة بني وجاي على بودري مافي منه مقارنة بنيكد ١ 
• verve  بيج رمادي 
• YDK لون دافى نحاسي محمر بني متوسط !مخملي 
• Busted فيه لمسة برغندي مع بني عميق واندر تون ذهبي  ينفع للحواجب لان مطفي 
• blackout اسود عميق ومطفي واللون واضح 

 

• • بشكل عام الالوان تتفاوت او تتنوع بين المطفي البودري والعميق اللماع ولمعة خفيفة ،حاولت قد مااقدر اطلع الالوان بوضوح وسويت سواتش لكن اللي سويت بس مسحة وحده بالفرشاه على يدي يعني لو سويت اكثر من مرة بيظهر اللون اكيد ، انا سويت كده متعمده عشان تشوفوا اللون من اول ضربة بالفرشاه .عموما البرايمر قبل المكياج مفيد بانه يظهر اللون اسرع .. وهذا بدون برايمر .
  • بشكل عام كنت محبطة مع انه اختي عجبها المكياج وكان حلو عليها لكني حسيت ان الشادوهات مزعجة نوعا ما مايظهر اللون بسرعة ومايمتزج بسرعة وتحسي اللون مو متماسك يعني يوسخ  خصوصا مع الالوان المطفية !
  • الجودة بشكل عام اقدر اقول انها جيدة بس مو ممتازة !يمكن انا ماحبيتها لان ببساطة تفاوت بالاذواق
  • تقييمي  بشكل عام 
  • الجودة ٩\١٠ عطيته هالنسبة العالية لان الباليت قوي  الفرشاة اللي معاه جميلة ،كان المفروض يجي معاه قلوس بس سيفورا ماعطوني اياه عموما سيفورا قاعدة اعصب منهم كل مرة اروح وشكلي بسحب سحبة ابدية 
  • الصبغة /pigmentation اعطيه ٦/١٠ اقصد بالصبغة اللون ودرجته وعمقه هل يعطيني اللون من اول مرة والا لا !ممكن لاني مااستخدمت برايمر لاني كنت مستعجلة ونسيته ! 
  • الملمس او texture اعطيه ٧/١٠ جربت باليتات احلى !لكن اقدر اقول لمعته ناعمة والذرات حقته مرة مايكرو !
  • longivity او الثبات ٩/١٠ حلو وماتغير المكياج !
  في مليون لوك تقدري تطلعي فيه ، من ورا هالالوان جميل وماتروح موضته ولو كنتي بارعة بالمكياج اللوك البرونزي ممتاز جدا ، تقدري تشوفي فيديوهات للنيكد ٢ وتطبيقات الاجانب !
• • السعر على مااذكر ٣٦٠ ريال من سيفورا ويجي معاه عينات برايمر
  
  

 [جوسي ايبر/ فير تمويج الشعر ] JOSE EBER/HAIR CURLING

اليوم  اخترت اداة تمويج الشعر وتكسيره من جوسي ايبر ،مي جديدة بس عليها اقبال كبير ، انا حبيت اتكلم عنها خصوصا والحين فترة زواجات وانا من النوع اللي اخاف على شعري ، ومااحب احد يلمسه واحب دايما اسويه في البيت  اخاف يحترق  وبصراحة مااحب التعامل العنيف مع الشعر ، خصوصا وان كل شي يسبب لي صداع ! 

المهم انا كنت محتارة  اني واختبي بين جوسي ايبر وماركة ميو ميو ! الثانية مي موجود لها  وكيل بالسعودية  بالصراحة سعرها زهيد وكل مرة يسوو عروض وقيف اواي عند الاجانب بس اذا طلبتها من النت راح اخسر الضمان خصوصا وان مافي وكيل بالسعودية

قررت اخد جوسي ايبر مقاس ٢٥  ، طبعا في عدة مقاسات ! اربعة وهم ١٣ ،١٩ ، ٢٥ ،٣٢، ايش الفرق بينهم كل ماطال الشعر يفضل تاخدي المقاس الاكبر ، احنا بالبيت في تفاوت بين طول شعراتنا فقررنا ان ٢٥ انسب شي ! 

الفير هذا ميزته مصقول بمادة تسمى التاتنيوم  واللي وظيفتها تحمي الشعر من حرارته العالية  اللي تصل ل ٣٦٠ ْ ، يضمن انه لايسبب الضرر للشعر  ولايحرقه او يتسبب له بالتقصف . 

طبعا زي مانتوا شايفين الفير مافي مسكة زي الفير التقليدي ، يعني يبغا له شوية مهارة  ويجي معاه قلوفز يحمي اليد من حرارة الفير لانك بتعتمدي على يدك الثانية باللف ، مهم مهم ماتنسي القلوفز والا بتحصلي حروق من الدرجة الثانية :@
الجميل فيه انه مصمم بطريقة ان لو حطيتي عالارض او الطاوله مايميل وبكده تضمني انه مايحرق لك الكاونتر !
طبعا سريع في انه يحمى ماياخد ثواني . اللي عليكي تلفي الخصلة عكس عقارب الساعة  ١٠ ثواني مو اكثر ويعطيكي موجات رائعة
زي مانتوا شايفين شكله جميل وفي عد تصاميم ، اني خديت الزيبرا برينت يجي باألوان مختلفة ومو بس فير يجي سيراميك او مكواة الشعر واشياء اخرى حتي في فرش للشعر
طبعا انتي ورغبتك في سماكة الخصل او كثافته بس اتعب وانا اقول جميل يعطيش لوكات جميلة تحسي زيش زي المشاهير
احب الويفي اللي عند الفرنش مع نفخة يعطي سماكة للشعر ويوهمش ان الشعر كثيف ، تقدري تشوفي فيديوهات للتطبيق للوك اللي تبغيه
جربته على الشعر المستشور والشعر العادي االي بدون استشوار والاثنين  ناجح وعلى ضمانتي ، تحمست وكنت ناويه اصور شعري بس بعديت تعوذت من الشيطان ان الشيطان كان غويا رجيما هههههههههه :@
ماعلينا
السعر ٣٥٠ ريال
المكان كشك بمجمع الظهران ..
هل أنصح فيه ؟
بقوة وشدة وعنف  يستاهل !

soy milk benefits /حليب الصويا

حليب الصويا ..

قبل ماحط هذا الموضوع قرأت واجد وبحثت ألف من مصادر أجنبية ودراسات لان في مؤيدين  للصويا وفي معارضين بنسب متساوية ،عالعموم قلب المؤمن دليله اي شي تاخديه يلزمك الاعتدال والوسطية ..

ليش حليب الصويا ؟ وليش مو حليب قليل الدسم او حتى كامل الدسم ؟

في البداية كانت معرفتي فيه لما كنت بالمتوسط امي وابوي شايلين هم الكالسيوم ويدوروا ليي بدائل اخرى بحكم ان عندي عداوة فطرية مع الجبن ومشتقاته  يشمل اللبن والزبادي واللبنه والقشطة وكنت اشرب حليب عادي في السنة حسنه بعد مليون إضافة مثل القرفة ، القهوة ، الهيل والسكر كله عشان يختفي طعم الحليب .كانوا يشتروا حليب الصويامن  فترة لاخرى يعندي يعتبر بديل للي مايحبوا الحليب 

السبب الثاني هو مناسب للنباتيين يعني مومعقوله نظام نباتي وتفطر على حليب البقر .فول الصويا يعتبر انسب حل !

سبب اخير ان غالبية ومعظم الناس يعانون من حساسية الحليب والمضحك انهم مايدرون ! يعني شعورك بالنفخة او الثقل او الغازات و اعراض اخرى وهذا طبيعي لان الطفل او الانسان بعد السنتين مايقدر يهضم اللاكتوز الموجود في الحليب !

مخاطر مرتبطة بفول الصويا ..

قبل لااقول المخاطر و اكيد بتنصدموا بتقولوا توها تنصح فيه ! هو تقريبا موجود بأغلب الاكلات المصنعة وخصوصا الشوكولاته مثل النوتيلا :| والكتكات والفليك جالكسي وسنيكرز والحليب البودره بجميع انواع والقشطة واللحوم والدجاج المثلج وبعض الايسكريمات  وبعض الخبز والصلصات والبنك بيري الي طايحين فيه الناس  وجميع منتجات المطاعم السريعة  لو القيتي نظرة على معظم المنتجات  اح تلاقي  اسم " ليسثين الصويا - الصويا-e322-بروتين الصويا - زيت الصويا "..

طبعا  فول الصويا ممنوع للرجال :

• لانه يزيد الهرمون الانثوي بشكل كبير 
• بروز الصدر عند الرجال او التثدي 
• قتل الانتصاب / قتل الحيوانات المنويه 
• زيادة الوزن 
• المظاهر الانثويه للرجل  مثل بروز المؤخرة ، نعومة الشعر، نعومة الصوت 
• عدم نمو شعر الوجه واللحية والشوارب عند البلوغ 
• زيادة الوزن 
• ارتفاع نسبة الاصابة بالسرطان والاورام مثل سرطان البروستاتا 
• يعني للرجال حليب الصويا وكل ماذكر ممنوع لايناسب الرجال ولا يصلح  ابدا ..

للنساء لاينصح باستخدام المنتجات المذكورة وتأكدي انك قد تكوني معرضة للسرطان الثدي انا اقصد منتجات تحتوي على فول الصويا اللي فوق
لكن النساء اللي يشكون من نزول الوزن وصغر الثدي والمؤخرة وعدم تكامل المظاهر الانثوية تأكلي صويا طبيعيه  صويا ايش ؟ طبيعية وعضوية 100٪  وشرب حليبها فقط . يعني احنا مشكلتنا  مع المنتجات الخربوطيه اللي كلها انتو تاكلوها يوميا وعاد هالنوتيلا اللي هابين فيه :| والروب المثلج وعلى فكرة ترى هالخربوطة دي مي روب اصلا مافي شركه تقدر تسوي كميات روب وبسعر زهيد هاذي بودرة بطهعم الزبادي يوهمونمكم انه زبادي وهو ولاشم ريحة الزبادي .. << الحمد لله الذي انقذني من الضلالة
احس ربي يحبني اي شي مو صحي فطريا مااحبه ولااقربه !

فوائد حليب الصويا ..وأهميته للنساء 

اول شي  الصويا من البروتينات المتكامله غدائيا لانها تحتوي على كافة الاحماض الامينية اللي يحتاجها الجسم  لبناء سلسلة البروتينات

• محاربة امراض القلب ويخفف معدل الكوليسترول المرتفع 
• يحافظ على عظام النساء بعد سن اليأس 
• يساعد على محاربة سرطان الثدي <<الطبيعي ، العضوي !!!سرطان القولون / سرطان غدة البروستات /بطانة الرحم
• يوجد فيه مادة الليستين <<تكسير الكولسترول في الدم 
• فول الصويا فيه مادة شبيهة بالاستروجين اسمها الفيتو استروجين يعني كيف تعمل ؟ توهم الجسم لما يكون عندك نقص في هرمون الانوثة وتحل محلها 
• تعمل على انقاص عدد التغيرات البروتينية الحاصلة في الدماغ اللي ترافق داء الزهايمر 
• يناسب النساء جدا عند سن اليأس لان يقل فيها هرمون الاستروجين في جسم المرأة 
• ملاحظة في مرحلة سن اليأس تعاني المرأة تقريبا من حوالي 150 عرض صحي منها عدم النتظام الدورة الشهرية ، متاعب مجرى البول والمسالك التناسلية ، زيادة ضربات القلب ، القلق ، العصبية ، الكتئاب، الام المفاصل ، تغير المزاج، الصداع ، زيادة الوزن ، الغثيان واضطرابات النوم ،شعور المرأة بالسخونة وزيادة التعرق ، والاحمرار. من المعروف ان نقص معدل الاستروجين يعرض المرأة الى اخطار عديدة  مثل تصلب الشرايين ، امراض القلب ،هشاشة العظام، زيادة حدة المرض لدى المصابات بالسكري ..

حليب الصويا طعمه مو سئ اختاري بالنكهات الحين حتى الربيع صاروا يجيبوا حليب الصويا اسمه JOYA انا اللي اخدته شوكوولاته وكان لذيذ وهذا اللي بالصوره فرنسي وبنكهة الفانيلا .مو الكل يتقبل طعمه بس عندي ارحم من الحليب .. 

موجود بالسوبر ماركتات

عموما لاتكثروا من الشي ترى حتى الماي اذا كثرتوا منه مضر

من اجل الحصول على خصر نحيف ومظاهر انثوية اكبر من صدر وارداف وشعر طويل 

لنآخد الاكل والاعشاب :

الصويا سر الاسيويات 

حليب الصويا 

حليب اللوز

الجنجل المتواجد في البيرة 

الشعير 

اكمل باقي الاكل ؟؟؟ 

خلوها في مدونة ثانية :))) واذا شفت تفاعل اكمل ..